متى تنصف المرآه السعوديه من الرجل السعودي؟

السلام عليكم ورحمة الله وبركاته
اليوم قريت موضوع وامثاله كثر لكن حبيت انقله لكم لانه فعلا شيء حاصل سواء كتبناه بصوره هزليه او جديه يؤسفني ان فيه رجال وخساره فيهم كلمة رجل يضطهدون المرأه السعوديه الي هي امه واخته وزوجته وبنته وووووالخ وينظرون لها نظره دونيه هذا غير انهم يستخسرون فيها ان يكون لها رصيد في البنك خاص لها او اي عقار يكون ملكها لازم يشطب عليها او يساومها .. طيب لييييييييييييييييييييييييييييييييييييييييييييييييي ه كذا ؟؟
واترككم الحين مع الموضوع الي قريته وضحكت عليه بس هذا لا يمنع من الرد على كلامي

تحلم البنت من طفولتها انها تصير ام وتدهر المواعين وذيك السله الورديه وصحونها البلاستيكيه وكل وقتها تقريبا وهي بالبيت مقابلتن مواعينها وكل وحده منها هي وخواتها مصممه لها خيمه صغيره وهذا بيت فلانه وهذا بيت فلانه ولاتشوف إلا عبي تسحب هذا طالعه من بيتها مسيره ومعها قهوتها وهذي جايه .. وعيالها عرايس وان ماحصل ( لفه لها مخده ولا قطعه قماش صغيره وقالت هذا ولدي ) .. وتكبر شوي ويكبر حلمها فبعد الولاده وانها تكون ربه بيت تبدا تحلم انها تصير مدرسه وتبدا يوميا برنامج اخر ( تجيك من مدرستها ثم نسفت الشنطه واخذت طباشيرها <<<< اللي لاطشتهن من الفصل ثم ادهرت على جدران البيت ولايقعد باب ولا جدار الا يكتب عليه ( الماده _ الموضوع )

ودفاتر تحضيرها اكثر من دروسها .. والمصيبه تشوفها تشرح ومنفعله وتكلم طالبات ( هي وحدها من يتصور وجودهن ) والاغرب انك تشوف بدفتر الدرجات اسمها مدرج من ضمن الطالبات .. <<< يسلملي هيك تواضع

تكبر شوي ثم تبدا تغيرات فيسولوجيه .. ومرحله مفترق طرق .. ويبدا الحلم لديها وهو حلم الزواج والاستقرار مع فارس احلام ترسم شخصيته من خلال ( اوتوغرافها ) <<< قديم
كل يوم تصور هالفارس ورجولته ومواقفه معها ووسامته وشلون ياخذها ويطير بها على الفرس الابيض <<<وهذا اللي نكبنا
وعلى غرار الفتاه ينشأ الولد بعيدا عن عالم المواعين والعبي فتكون بداية حياته واختلاطه بالمجتمع قاسيه نوعاً ما .. تبدا بهوشات وفلعات وغالبا نوعيه الشله في البدايه هي من يحدد شخصيته القادمه ..

وهي غالبا تنحصر في بلادنا الى ثلاث فئات ( دوافير ، ناعمين ، زاحفين ) ..احد هذه الفئات هو من سيكون شريك البنوته ( ام اوتجراف فوشي ) ..

تبدا البنت في رسم حياتها الورديه في وسط كلمات العشق والهيام وتتصور في داخلها ان هاللي تبي تاخذه .. بيصبحها بحبيبتي ويمسيها بحياتي .. وتتخيله وكيف هي وياه على شط البحر وهو يتغزل بها .. وكيف يمطرها بالقصيد والخواطر الغزليه ليل ونهار .. ويجي اليوم اللي انتظرته من طفولتها ويزفونها لابو الشباب ..

وكلنا يالشباب نكون مبرمجين اول العرس على نظام معين وتختلف مقاومه هالسيستم من شخص لشخص .. احدن يهنق وتخرب برمجته من اول شهر .. و أحد برمجته تدوم فتره اطول .. وفئه اخرى قليله كل ماخرب عندها السيستم راحت تسوي ( اب ديت ) .. وهالنوعيه نادره مثل ماذكرت .. وتبدا بعد هالمرحله الورديه مرحله الفنايل العلاقي وسراويل السنه بالادهار .. ويبدا البرنامج اليومي بالتغير .. وهو نوم الى المغرب ,ثمن يقوم يتزبرق ويتسنع ويكملها بالاستراحة إلى أنصاص الليول. وتخف الكلمات الرومنسيه والغزليه الى ان تختفي تماماً ..

المصيبه انه يظل يطلب من زوجته انها ( ماتغير السيستم حق شهر العسل ) .. نعنبوا بليسك الحرمه غيوره اهتم بنفسك وبتشوفها تسابقك في كل مايبهرك مالت عليك .. وبتسوي كذا حتى ترتقي لمستواك أوعشان ما تعرس عليها ..
اشوف بعض الرجال واقول بنفسي ( ياحظ زوجته بالجنه ) .. لصبرها على قذراته وسوء خلقه .. نعنبوك والله لو اني حرمتك لاذبح نفسي .. ولا تخيل شلون هالمسكينه يجمعها معه بيت واحد فما بالك بسرير واحد .. <<< حامت تسبده

لا وفوق هذا يمكن بعضهم ماعمره بحياته نادى زوجته باسمها .. اما ناداها ( هيه ، هيش ) <<<<مصطلحات سعوديه لنداء الزوجه ..شلون تبي زوجتك تحترمك وتغنج لك وانت تناديها كذا ؟

وان وداها بيوم سوق ولا محل بدل ماهو معها يشور عليها ويسولف معها اثناء تسوقها كانه ذاك اليوم رايق و ذابحته الرومانسية قال إلى قضيتوا تراي واقف برا أحتريكم .. <<<وفيها منه بعد انه موديها السوق عشان تشري شي تلبسه له ولا يلبسه هو لها .. (بعذرها المسكينة يوم تشتري بيجامات من تخفيض دبنهامز أو ماركس و سبنسر لان مافيه امل تلبسهن ) ويمكن خبرك فيهن يوم تقاوسهن بالبيت بعد ماشرتهن ) ..

تبونها ركبتها بيضاء ونعومه مابعدها نعومه ورقه ورومنسيه وجسمها مثل هيفاء وانتم الاصابع اظارفها شبر , وسبوت الرجلين يدخل بها الاصبع .. صح ان الركب السود صارت علامه مميزه بس ماهوب من زينكم انتم عاد ..
<<< معليش يابنات بس ترا من يشوف قناه بدايه يحسب انه عند محل حواج ولا عند عطاره ابا الخيل ، اخبر الخلطات للتفتيح والتبييض اما خلطات تصغر الخشم هذي جديده ولا سبقكن عليها احد .. لا وتبيها قبل عرسها باسبوع والله لو اوباجي مايمديهم صغروه باسبوع !!

تحمل غثاكم وتشيل ابنائكم في احشاءها 9 شهور ثم تولد وتسهر وتربي وانتم مابين شلة المقهى وشله البلوت .. وتطالبون بالمزيد بعد ، ودي اعرف او اسمع مره بحياتي ان فيه سعودي صلح الرضعه حقت ولده او بنته بنفسه او بدل له حفاظات !!

البعض ( واقول البعض لان ماودي احط بذمتي شي لان اعرف رجال ضد هالشي ) البعض تكرف زوجته في عملها ودوام وتعب وحاله وبطاقه الصراف بمحفظته .. نعنبوا بليسك استح .. مالت عليك هيك رجوله ..

اذكر واحد من عيال جيرانا الله يذكره بالخير .. وهالولد مقرود من طلع على وجه الدنيا .. حتى ولادته مالله يسرها مثل باقي الخلق ..
تسولف لي امي عن ولادته ..وتقول أن أمه يوم جابته وشافه دكتور الولاده رجعه لبطن امه وقال لها ياعمه اتمنى انك تصرفيه في مكان ثاني هذا مكانه مو هنا . انا مرت علي عاهات واشكال غريبه لكن مثل ها المخلوق الفضائي ماشفت .طبعا الممرضات اول ماشافوه اغمي عليهن وفيه وحده بعد ماشافته قدمت استقالتها على طوول وقالت يلعن ابوها هيك شغله اذا فيه اشكال مثل هيك بتعيش في مجتمعنا ..

من تحمله بالاخير تحملته امه ( الله يخليها له ولو انها بغت تطلع روحها بولادته ) هالحبيب له 5 سنين معطي امه مواصفات لو طلبها من مصنع حريم ماطبقوا له هالمواصفات اللي هو يبي وسمعت انه حتى مقاسات الخصر معطيها امه .. ولاتروح تخطب من احد الا معها ( المتر ) تقاوس كانها خياطه ..( ليه كل التعجيز وشهو عشانه ؟؟ )



نقاط على الهامش :
-


لاتقارنون السعوديه بغيرها ترا والله مايملى العين الا هن ( جعلهن يسلمن والله يصلحهن ويهديهن ) ..

- ادري ياشباب فيكم اللي عكس النظريه وخربت برمجة مدامه الرومنسيه والعاطفيه وهو برمجته مازالت نقوله اصبر واحتسب ومالك الا اجر وترا الشرع محلل لك اربع ويمكن يكون في الثانيه مايثير الغيره في الاولى ويحفزها ..

- تاكد ان كل شي تبينه من زوجتك هي تبي مثله فلا تطالبها بالكشخه وانت سردادي مردادي بالبيت بفنيلتك النص كم وسروالك .. اهتم بنفسك بارك الله فيك واحرص على الزين يجيك اللي ازين منه ..

- ابتعد عن المقارنات خاصه مع الممثلات والمطربات ( ترا لو بنطبق هالنظريه ماقعد بالسعوديه حرمه في ذمة رجلها للحين ) ..

- وانتم يابنات ترا قناة بدايه والخلطات اللي فيها تبي تجيب العيد فيكن .. اركدن شوي .. وترا الرجل السعودي ورغم العيوب اللي مايخلى منها انسان ( الكامل وجه الله سبحانه ) تراه مامثله احد لا في فزعته ولا في رجولته ولا في شهامته ومن تكلمنا عنهم فوق اتمنى انهم قله .. وعشان كذا سلطنا عليهم الضوء .. عشان يلتفتون لحالهم .. اخواني ترا الأنثى معطاء جرب تعطيها حنان و بترد لك أكثر .. ..

تحياتي

والله يااختي الموضوع طويل ويبغاله قعده راح امسك في كم نقطه من الموضوع فقط
اولا من ناحيه ان الرجال ماينصفون المراه فهذا راجعه قد تكون للعادات والتقاليد بعضها والبعض زياده من بعض الرجال في السيطره والتحكم بحيث انها ماتاخذ حريتها لكن في كثيرين عندهم عقل ويفكرون بزوجاتهم قبل نفسهم ويحبونهم لحد انه قد لا يريد التاخر عن البيت كي لا يفتقدها وهذا النوع في النهايه يطلع خسران لان المرأه لا تحب الشخص اللى رامي نفسه مره فتلاقيها اما مع صاحباتها اهم شئ انها لاهيه عنه
+++++++++++++++++++++++
من ناحيه الزواج تلاقي الواحد استغفر الله بتزوج ذي والجنسيه الفلانيه واكثر اللى متزوجين من بره ندمانين لان الاخلاق مو وحده ولا العادات والتقاليد ويرجع في مشاكل لحد ان واحد من اصحابنا متزوج لبنانيه بس عاد هم مره عادي الوضع عندهم لقاها تبوس اصحابها الشباب وكان اللى عندها في البيت مو زوجها كانه كيس بصل طبعا طلاق ومشاكل وفي النهايه دور على اللى تحمي عرضه وشرفه رجع لبنت بلده السعوديه
++++++++++++++++++++++
اما من ناحيه الاسواق فالغلط مشترك تلاقي بعض الرجال يحب ان زوجته تجي معه السوق ويتمشون مع بعض بس نجي لمشكله الحرمه هنا لا خشت سوق كانها خشت كهف فيه كنز تلاقيها تقعد في المحل الواحد ساعه يعني نمر بقيه المحلات نخرج الصبح كيف
ماتبين الرجل يمل
والرجال بعضهم لا جا مع صاحبته او لحاله تلاقيه قاعد في السوق ويقعد بالساعات بس لا جات زوجته معه تلاقيه تقول بطنه تعوره ويبي يروح الحمام كل شوي يقولها يلا يلا خلصينا يلا
___________________
في النهايه الموضوع اكبر من نقاش عادي اشكرك اختي ملاك الحب بس ياريت تنحل مشاكل الزوجات والازواج بهدوء وحب اكبر سلام

كلامكــ سليم اخ سندويش

ويعطيكــ الف عافية ع مروركــ العطر

والله ماعرف وش اقول ماعرف في سوالف الزواج ومشاكله >>>>>>

الله يعطيك العافيه
اختي ملاك الحب
ع الموضوع