البارحة جاني من الحب مرسال

بسم الله الرحمن الرحيم

هذه قصيدة رائعة وفكاهية حبيت أنقلها لكم واتمنى تعجبكم
----------------

البارحــة جاني مـن الحـــب مرســـال
من عقب ما بينـي وبينـــه خصيمــــة

وانا تـــرى في الحـب مانيـــب فعّـــال
ولا بعـــــد ولّــــع بقلبــــي هشيـمــــه

ولا بعــد غنّيت فــي ساعـــة وصـــال
ولا بعـــد ذقــــت الفـــراق وجحـيمـــه

ولا جـــرى دمعي على الخــد همّـــال
ولا بعــــد جربـــت مـــــرّ الهزيـمــــة

حتـــى وردنـــي تالـي الليـــل جــــوال
وانا علـى شاهي وبسكـوت ديمــــة

الرقــم بايــخ لكــن الصـــوت قـتــــال
كنه مثــل صــوت المذيعــــة حليمـــة

قالـت: مساء الخير يـا طيّـــب الفــال
قلــت: ارحبــي ترحيبـــةٍ مستديمـــة

بالعـــود والصفــري ودلـــة وفنجـــال
واجبـــك يا بنت الأصـــول الكريمــــة

ردت بضحكة .. ثم قالت وش الحـال؟
قلــت: اشهد إن الحال عقبك سقيمـة

قالت وهي تضحك بعد مثل الأطفــال:
وانــــا بعــــد كنـــي بدونـــكـ يتيمـــــة

مـــن يـوم قالتهـا .. تزلزلـت زلـــزال
مـــن فجعتي كنـي مســـوي جريمـــة

قلت ارفعي صوتك ترى مابه ارسـال
كــــذاب لكـــنّ الـمصيبـــة عظيمـــــة

قالـت: أقول اسمع ترى هرجنـا طـال
ممكـــن تصاحبنـي ترانــــي وسيمـــة

واسمــي الحقيقي أول حروفـه الـدال
لكــن يسمّونـــي البنـات .. الزعيمـــة

صحيح أحب الفخفخة واعشق المـال
لكـــن ترانـــي طاهـــرة مستقيـمـــــة

ما عندي امغازل ولا ( لعب "يهّـال )
ما عندي إلا في الشرف والحشيمـة

بس الصراحــة قلبـي لشوفتـك مـــال
واصبحت وحـدك جالسٍ في صميمــه

فكـّـــر بعقـلك واترك القيـــل والقـــال
واحذر تطيــع اهل العقــــول العقيمـة

وارسـل علي الحين خمسمية ريــــال
أشحــن بهـــا جــــوال أختـي غنيمـــة

أو طقم غالــي فيـه خاتـــم وسلســـال
أروح بــه فـــي عـرس والاّ عزيمـــة

قلـت الحقيقــة مانيب رجـال أعمــــال
ولا نـــي بـ تاجـر والمـــوارد عديـمـــة

أنــا الصراحـة شبـه عطّــــال بطّــــال
وعلاقتــــي بالفقـــر جـــداً حميـمـــــة

والراتـب الله يرحـم الحـــال مـــا زال
محـدود والمصــروف ربـــي عليمـــه

والديـــن بــالآلاف والبنـــكـ شغّـــــال
يـاكـــــل فلوســـي بالربــا والظليمـــة

والسـوق طايح والغلا ضيـّـــق البـال
والموت والله صايـر اكبـــر غنيمــــة

قالت: تحمّـل بــس والحمـــل ينشـــال
خلــك شديد البــاس صلـب العزيمــــة

ياخــي تصرّف جعلك اتصيـــر نشّـــال
أهــــم شــــي إن النوايـــا سليـمــــــة

لابــد تفهمني علــــى كـــل الأحــــوال
ما دمـت من أهــل العقـول الفهيمـــة

قلــت إيه والله فاهم اللي على البــال
لكــن تـــرى هــذي علينـــــا قديمــــة

يــا بنت هـــذا صايـــر اليــوم مــــوال
للــي تبي تلعب علـى ابـــن اللئيمــــة

يا بنــت ما تدريـن كــم فيـــه محتـــال
يلعب على الحبلين وانتــي غشيمــــة

يا بنت كم من جاهلــة دمعهــا ســـال
من عقب ما جات العواقــب وخيمـــة

والبنت لا اقفــى عرضها بيد الأنــذال
والله مــــا يبقــــى لهـــا أي قيـمــــــة

قالت: تبـــي ولاّ فخلـّــكـ علـى جــــال
ماهــو بنـاقصنـــي نصايـــح حكيمـــة

عز الله إنـكـ للأســـف منـــت رجّــــال
وانــك قليل الـذوق ما فيـــك شيمــــة

يالعـن ابو اللي مـا يسطّـرك بنعــــال
حتـــى يعلمـــك الغــــزل يـا بهيمـــــة

(تفــوو) عليك وصكّت الخط في الحال
مدري (تفــووو) هي مدح ولاّ شتيمـة
----------------

ان شاء الله تكون القصيدة أعجبتكم


تحياتي/جبوره

يعافيك اخوي ...

يسلمووو على مرورك العطر...

تحياتي/جبوره

الله يسلمك جابرة الخواطر