العصبية في حياتنا اليومية

السلام عليكم

كيف حالكم ان شاء الله انكم بخير وصحه وعافيه يارب..

الموضوع اللي باتكلم فيه اليوم موضوع واقعي ويحدث معنا جميعا او الغالب منا ..


في بعض الاحيان يجيك اخوك او احد زملائك يطلب منك طلب وترد عليه انه مايمديني او مشغول ولما يجلس يقنع فيك ترد عليه قوم عني تراها واصله هنا وتأشر بيدك على خشمك
واصله عند خشمي هذا هو موضوعي اللي ابي اوصله, ليه حنا دايم نستخدم هالكلمه وبكثره بعد يعني اخواني يقولونها ابوي يقولها اصدقائي ؟؟؟

طيب خلونا نبحث بالمشاكل وهل هالمشكال صدق تخلي الواحد يعصب وتوصل لخشمه على قولتهم؟؟


بعد ماراقبت الوضع لمده اسبوع عشان اسوي هالموضوع ويكون اكثر واقعيه ويكون اكثر صراحه

قلت اول ماحد يقول لي هالكلمه ابي اجلس استفسر واطفشه واعرف ايش اللي مخليه يعصب واسجل هالشي بورقه



جيت بعد فتره جلست عند اخوي كان يتفرج على تحليل مبارات برشلونه وريال مدريد.

قلت له شفت النصر كيف فاز اليوم على الفريق المغربي والله شوي ونطلع من البطوله

طالعني وكنه يقول بقلبه (( انت باقي تشجع النصر؟؟ )) ماتكلم ولف راسه يتفرج على التلفزيون

قلت له بس ترا الطرد حق النصر اليوم ماهو صحيح ياخي اشك فيه
طالعني بنظره اقوى من اللي قبله وكنه يقول بقلبه يارجال 8 سنوات وانتم ماوراكم غير التحكيم

قلت له وبصوت عالي هالمره .. هههه ياحرام ريال مدريد انهزم اليوم ههههه والله ورنالينهو سوا العجب فيكم

قاطعني وقال لي .. تراها واصله هنا واشر على خشمه

سكت انا قلت باجلس جنبه واشوف من وشو معصب؟؟

جاء التحليل وجابوا لقطه لهدف رونالدينهو قام يصرخ شف الدفاع كيف يتفرج فيه؟ شف الحارس حتى ماتقدم له.....الخ

قلت انا الحين هالمبارات هي اللي معصبتك ؟؟
قال ايه ياخي شي يقهر

قمت انا من عنده وانا اصفق يد بيد واتحمد الله على النعمه اللي انا فيها يعني عشان ريال مدريد يعصب على ويقول واصله لخشمه؟؟؟ <<< اشوا انك تضرب اخوانك الصغار يوم ينهزم النصر لووووول


المهم طلعت من عند اخوي ورحت لصديق لي عشان نطلع الاستراحه وحنا بالاستراحه كان واحد جالس وساكت وماهي عوايده

وش فيك يافلان؟ قال لاحد يكلمني تراها قافله معي واصله حدها

وش اللي مضيق خلقك طيب؟؟
رفض يتكلم يقول مافيني شي بس اليوم خلقي ضاايق

شوي دق الجوال الا هذا ابوه ..ومن الكلام فهمت انه ابوه يبيه بكرا يطلع معه البر عند البل وهو مايبي وابوه غاصبه عشان كذا قافله الاخلاق


واحد بعد بنفس الجلسه كان قافله معه نص قفله
سالته وش فيك؟؟ قال بكرا عندي اختبار ولا ذاكرت شي؟؟

قمت اضحك انا ولفيت وجهي لاني لو جلست اطالع فيه ابي انقز عليه وانتفه بكف اجيب اجله هههههه

اللي ابي اوصله ياخوان من هالموضوع مافي شي بالدنيا ذي يستاهل انه نتضايق عشانه او نزعل والله لو نفكر فيها بعقل نحصل كل الايام اللي زعلنا فيه كانت باسباب تافهه وندمانين عليها الحين

مثل انا زعلت يوم النصر طلع من الدوري ابوي زعل لان له ناقه ضاعت اخوي ريال مدريد انهزم واحد من زملائي ابوه يبي ياخذه البر

كل الاسباب تافهه ولا تستاهل احد اصلا يفكر انه يتضايق عشانها

اما اخر واحد اللي متضايق عشان الدراسه هذا حال اغلب الشباب والبنات عندنا يعني داخل كليه ويدرس طول السنه يعني ماهو متوقع فيه اختبارات اخر شي؟؟

طيب دام انك عارف ان فيه اختبارات ليه تضيق خلقك؟؟ بدال ماتضيق خلقك ذاكر وشد حيلك...


وبنهاية موضوع ابي اختمه بالايه القرانيه


بِسْمِ اللّهِ الرَّحْمَنِ الرَّحِيمِ
(( أَلَمْ نَشْرَحْ لَكَ صَدْرَكَ (1) وَوَضَعْنَا عَنكَ وِزْرَكَ (2) الَّذِي أَنقَضَ ظَهْرَكَ (3)
وَرَفَعْنَا لَكَ ذِكْرَكَ (4) فَإِنَّ مَعَ الْعُسْرِ يُسْرًا (5) إِنَّ مَعَ الْعُسْرِ يُسْرًا (6)
فَإِذَا فَرَغْتَ فَانصَبْ (7) وَإِلَى رَبِّكَ فَارْغَبْ (8) ))



مايستفاد من الموضوع :

مافيه شي هذي بالدنيا يستاهل اننا نزعل او نتضايق عشانه .

اذا زعلت او ضاق صدرك صلي لك ركعتين واقراء قران وحاول انك تنسى الموضوع وماتفكر فيه كثير.

رضا الوالدين عنك من اهم اسباب الراحه النفسيه فحاول انك ترضي والديك قدر المستطاع لان مهما سوينا لهم ماراح نقدر نقول عن نفسنا اننا ارضيناهم .


أتمنى اني وفقت بطرح الموضوع ولو وبشكل بسيط


كل التحيه والتقدير مني لكم