رحله ** تنتهي بحفر القبور وضياع في ليل ومشي اكثر من 10كم خذ العبره (صور بشكل اخر)

ع ــآيــض · 03-18-2009, 09:54 PM

بسم الله الرحمن الرحيم
السلام عليكم ورحمة الله وبركاته
مساكم الله بالخير جميعا

أضع في أيديكم قصة أشبه بالخيال وأنا كل ما أتذكرها أقول اعجوبه
هذه قصتي أنا وولد عمي (( القطاوي ))
وأخي الذي يدرس بأول متوسط
وحنا عند الغنم
الجو صقيع وبرد يقص العظم وأضف الجو غائم كليا والليلة مد لقسه ظلمه ما تشوف يدك

لا أطيل عليكم

هذا مره من المرات والغنم مستفليه بكا الروض الخضر والحزوم من حولها دهم قريطا ـ قريقلان ـ ربله ـ صفار ـــ والجريد ( الرقروق ) بلإضافه للفقع
وحنا نلقط فقع شوي بعيدين عن الغنم
وأنا أشوف اثر الأرنب وهذا حنا نقصه لما وصلنا بمكان بعيد عن بيت الشعر والغنم
المكان اللي ضيعنا به الأثر وعر وبه طعوس رمل وغدير والتلعه ضيقه
والتلعه بها شجر 99% إنها بكا المكان لأني مره شفت أثرها قبل أسبوع من هالسالفه

ما أطيل عليكم نخش بالزبد ه

اتفقنا بعد العشاء نروح انتقنصها وجانا عاد رجال وعزمنا ولبينا دعوته وتعشينا عنده وسرينا الساعة
11.30 الوكاد شاورت خوياي قلت يا الربع وش رايكم ( كان جوها برد وصقيع يقص العظم )
قالوا هونا ولا نبي ندور بالليل ولو يصير شيء بالسيارة ناكل هواء بهالليل
قلت يارجال خلونا نزرق نص ساعة ونجي
....قالوا يالله وما ندري عنك؟؟؟
الوكاد بعد المكان عن بيت الشعر 3 كم
وهذا حنا من طعس لطعس ومن حزم لحزم مسح ماهي سالفة ويوم قالو لي ما في شيء
وأنا المح نظره غريبة على راس النور وأنا فوق الحزم قلت لخوياي شفتو العيون قالوا والله ما انتبهنا وأنا انزل طاير وزين ما قلبنا ومن السرعة
وادخل بالغدير استانست على أرضه وأنا اخش داخل وكل شو القاع يصير بها زي الرمل والحصو الصغير ويوم شفت الصحيح حاولت ارجع
لكن الرجعة صعبه بالحيل وحاولت ما ارتخي عن السيارة وأبي ارقي الجرف

قالت السيارة هذا مكاني

عند الغراز كانت الساعة 12.10 بالضبط

وهذا حنا كل ليلنا نحفر بهالموت ونرفع بالعفريته
وخوياي يلوموني
الوكاد تعبنا
ومعنا تريك بطارياته ضعيفة ويقول القطاوي خلنا نجمع حجر ( رضم ) مصلفح ونخليها تقول قار
والوكاد
يا سبحان الله المسلفح ؟؟؟ تقول محطوط لنا
ومن أخذنا الحجر السيارة تقول ما سكها شيء ما تتحرك بنوب
ونحس ان هناك حركه خلفنا لكن ما القينا بال لها
الوكاد ايسنا
وقررت نمشي ونترك السيارة حنا ثلاثه لا نقدر نقعد بالسيارة والجو يمطر و يذرذر ها الناعم وحنا بغدير مكب التلعه
الوكاد ونمشي على الأتجاه وحسينا إنا غاديين
وقلت حنا تياسرنا
وقال خويي حنا تيامنا ....... وهذه بداية الغديه....
التريك قام ما يشتغل
انا معي الشوزن والخريطه والسكتون ومفتاح السياره والأثباتات امشي بس بالكوت
وخويي التريك وشوزن الثانيه واشوا مني لابس فروه
واخوي لابس فروتي
القاع بها ذيابه
وهذا حنا نمشي ولا ندري وين
لكن سبحان الله
فج ضوء عرعر ويتضه معلم اللي هو
التل هذا الحزم او التل واضح وحنا يسار منه
ونا اقول ياخوي حنا بتلعت بيتنا
قال ما اطيعك
واخوي يقول .... اسمع صوت حمار ... الله يكرمكم
يا ابن الحلال هذا البرج وقاعد اوصفله وما رضى
جينا البرج الذي يبعد 4 كم عن البيت
بس حنا تعبانين حيل ومتكسرين الساعة 2.23 دقيقه
وحنا نقصد البيت ......... ونغدي ثاني مره
ونمشي وحنا مضيعين
واخوي يقول ... اسمع صوت احمار ... وليه بيتنا اهناك وهذا صوت حمارنا اللي عند البيت
والله
وينه يا ولد قال بس اسمعوا وأنا أشوفه الحين
أخذنا شوي وحنا أنتسمع لصوت وعرفت القاع وطلعت التلعة اللي بها غنمنا
( وذاك شعيرنا وهذا شراع الجلد ) وصلنا البيت وأنا أشوف الموز معلق والزبادي وبرتقال وما ادري وشو وحنا مشينا وما في شيء وقلت الدعوة بها إن )
كانت الساعة 3.05الفجر وحنا ننام وأنا اقعد الساعة سبعه الشمس توها تطلع
وأنا امشي لجيرانا عنا 2.30 كم أدور سيارة على شان نجيب سيارتنا وما لقيت مفتاح السيارة
ولقيت الراعي هندي سألت عن مفتاح بس يهزلي براسه يقول ما في معلوم
خليته يصلح لي شاي لان خاشني البرد
وسبحان الله وهذا خالي راح رواي يم الماكينه ومعه عيال اخوه
وهو بالعادة ما يمر من هذا الخط وأنا اشر له
وشافوني اللي معه ورجع وقال هذا اللي كنت متوقعها والبارح ما قدرت أنام وكل شوي أقول
ارو حلهم اتطمن .... أقول لا :: صقر ::: جيد ما ينخاف عليه
الوكاد أخذت رز اله منه بنكهة ألماجي والفلفل
رجعني لبيتهم وأخذت السيارة مالته
وأنا اروح واقعد خوياي وكانت الساعة 11.15
ونروح بعد الفطور وكاسة الشاي يم السيارة
والله العظيم بس حركناها شوي ومشت تقول ما كأنها مغرزه

بسم الله الرحمن الرحيم

الشاهد في هذه السالفه
# العيون اللي شفتها كانت طالعه من ......
# الحجر المسلفح هو حجر القبور
# القبور عددها ستة قبور وقبر صغير بعيد شوي عنهن
# والسيارة ما قدرت تمشي لان البلا هنا
# عمي صارت له سالفة بهذا المكان وقال سلمتو من شيء عظيم وأنا جرى لي مثل ما جرا لكم وأكثر
# الموز المعلق واللي معه البرتقال والزبادي
كان ولد عمي جايبهن وراجع يم غنمهم
( السلطان)
# مشينا اكثر من 10 كم
..................

أخذت عبر كثيرة ومفيدة لي ولك ولأهم :

# السماع لنصيحة ورأي اللي اكبر منك ( اكبر منك بيوم افهم منك بسنه )
# الهدوء في مثل هذه الحالات والمواقف
# التركيز وبحث عن انجح طريقه
# عدم التهاون والزجر من رأي الطفل يمكن يكون رأيه أرجح من رأيك
# إظهار القصة بشكلها الحقيقي دون نقص وزيادة
# الإستفاده من تجارب الآخرين
# أهدأ أثناء المقتاص لان اللي لك ما هو لغيرك

أتمنى إنكم شاهد توا وتأملتم ما حدث
رأيك يهمني
واسف لو كان هناك بعض الكلمات غير مفهومه
أتمنى لكم وقت ممتع
م/ن

انسان لن يتكرر · 03-19-2009, 03:13 PM

هههههههههههههههه

استمتعت ونا اقرى القصه

و فهمت الموضوع في الاخير

يعطيك العااااااااافيه اخوي عايض

وآصل ابدآعكـ ،،،

ع ــآيــض · 03-30-2009, 10:41 PM

ههههه

الله يعافيك ومشكور على مرورك الجميل

.: خـفـايـا انـسـان :. · 04-10-2009, 02:39 AM

يعطيك العآفية يالغلآ ع الموضوع الرآئع :.

بأنتظااار جديدك

تــ ح ــيـاتي

•.~{ღsάмŋỹ Яǿ7ќღ · 07-12-2009, 04:31 AM

يعطيك العافيه ع القصه الممتعه لا هنت

ودي

الأيهم · 07-15-2009, 04:39 PM

هههههههه
حلوة القصة تسلم اخوي عايض


تصميم مواقع	دليل مواقع	توبيكات	وسائط	اضفنا للمفضلة

أدوات الموضوع
عرض نسخة صالحة للطباعة أرسل هذا الموضوع إلى صديق
طرق مشاهدة الموضوع
العرض العادي الانتقال إلى العرض المتطور الانتقال إلى العرض الشجري

المواضيع المتشابهه للموضوع: رحله ** تنتهي بحفر القبور وضياع في ليل ومشي اكثر من 10كم خذ العبره (صور بشكل اخر)
الموضوع	كاتب الموضوع	المنتدى	مشاركات	آخر مشاركة
مهلا يا عاشق الدنيا..ماذا تعرف عن القبور؟	عمار الخضر	المنتدى الاسلامي العام	2	03-16-2009 05:57 PM
آخااف لاقلت ( آلوو ) تخنقني العبره	ياسمينا	عذب القصيد	2	10-22-2008 07:40 AM
أنا غصّتني العبره .. دخيلك لاتبّكيني ..!	مذهله	عذب القصيد	15	08-15-2008 01:04 AM
نصف ساعه قضاها هذا الشاب بين القبور .. ادخل واعتبر	الزين كله	المنتدى الاسلامي العام	5	05-23-2008 08:03 AM
نصف ساعه قضاها هذا الشاب بين اهل القبور ..انظر ماذا رأى فيها	kha42led	المنتدى الاسلامي العام	6	12-28-2007 02:41 AM

الذين يشاهدون محتوى الموضوع الآن : 1 ( الأعضاء 0 والزوار 1)

رحله ** تنتهي بحفر القبور وضياع في ليل ومشي اكثر من 10كم خذ العبره (صور بشكل اخر)

رحلات صيد - رحلات قنص - رحلات برية